13. nóvember 2020
Fótsporin – dæmi um fjölbreyttar kennsluaðferðir
Miðstöð símenntunar á Suðurnesjum tók þátt í verkefni sem kallaðist TELLE. Samstarfsaðilar voru frá Finnlandi, Noregi, Eistlandi, Þýskalandi.
Samstarf og samvinna í verkefninu var mjög góð og tengdist hópurinn vel og deildi reynslu sinni. Þegar hópurinn hittist á Íslandi þá voru þátttakendur að miðla mismunandi kennsluaðferðum sín á milli og var það mjög áhugavert. Finnar komu með kennsluaðferð sem við köllum „fótsporin“ og við í MSS tileinkuðum okkur þá aðferð og höfum verið með fjölmörg námskeið byggð á þeirri aðferðarfræði fyrir fyrirtæki og menntastofnanir og einnig hjá okkar nemendum í allskonar útgáfum.
Aðferðin gefur möguleika á að taka málefni kennslustundarinnar og láta nemendur kryfja það niður. Sem dæmi um fótsporavinnu á vinnustöðum þá klippir fólk gjarnan út fótspor sitt og setur t.d. hlutverk sitt á vinnustaðnum (yfirleitt myndrænt) á annað fótsporið en styrkleikana á vinnustaðnum sínum á hitt sporið. Þegar þátttakendur hafa gert það þá ræða tveir og tveir saman og útskýra sín spor. Þegar því er lokið þá er gerður stígur (sem er límdur upp á vegg) úr öllum fótsporunum í átt að vita sem er búið að líma einnig upp á vegg. Stundum ákveða hóparnir að hafa stíginn með sporunum sínum kræklóttan ef einhver snúin málefni eru í deiglunni en að lokum kemur stiginn að vitanum.
Þá koma 5 saman í hóp og ákveða úr hverju vitinn þarf að vera byggður s.s. seigla, kjarkur, fagmennska, góð tækni og svo framvegis, eftir því hver hópurinn er og hvaða efni er verið að vinna með. Síðan velja hóparnir leiðarljós sem vitinn lýsir frá sér sem eru þau markmið og tilgangur sem við viljum ná fram. Það gæti verið; góð samvinna, gleði, fagmennska, hjálpsemi, frábær vinnustaður, árangur nemenda eða viðskiptavina og svo framvegis. Við höfum þróað fótsporavinnuna áfram og nýtt hana í fjölmörgum aðstæðum. Fólk kemur saman með liti og skæri og þarf að gera eitthvað allt annað en það býst við á námskeiði og það kemur einhvern veginn annar kraftur í loftið.
Við nýttum einnig þessa vinnu á 20 ára afmælisári MSS þar sem við fengum nokkra hópa nemenda til að vinna með fótsporaaðferðinni og kryfja leið sína í námi hjá MSS. Þá fengum við bæði fyrrverandi og núverandi nemendur og úr fjölbreyttum námsleiðum. Þetta var mjög áhugaverð vinna og fengum við síðan listamann til að túlka árangurinn með okkur og út kom þetta frábæra listaverk sem er samstarf nemenda (fyrrverandi og núverandi) og kennara og listamannsins Eyþórs Eyjólfssonar. Það er gaman að segja frá því að vitinn lýsti leiðarljósunum; sigri, þekkingu, árangi, fjölbreyttum möguleikum, ég get, góðir vinir og svo framvegis þó sporin hafi oft verið þung í byrjun og stígurinn kræklóttur í byrjun vegferðar í námi.
Málverkið er eftir Eyþór Eyjólfsson (Ethoríó 2018) sem túlkar þann ólgusjó sem margir nemendur okkar ganga í gegnum áður en nám hefst og í byrjun þess. Fótsportin geta oft verið erfið í byrjun en svo léttast þau og birtir upp og sigri er náð.
MSS er nú í Evróuverkefninu CDTMOOC. Í febrúar síðastliðnum þá var 5 daga námskeið í Finnlandi sem hluti af þessu verkefni. Þá sáum við í MSS um þátt sem nefndist Evrópa – hvað eigum við sameiginlegt og hvernig sjáum við fyrir okkur Evrópu í framtíðinni. Við nýttum okkur fótsporavinnuna sem hluta af þeirri kynningu. Það var skemmtilegt að geta deilt kennsluaðferðinni með kollegum okkar og ekki síst í Finnlandi þaðan sem fótsporavinnan kemur.
