30. nóvember 2020
Fyrirmynd í námi fullorðinna 2020
Á aðalfundi Fræðslumiðstöðvar atvinnulífsins (FA) sem haldinn var fimmtudaginn 27. nóvember, var Guðbergur Reynisson frá MSS valinn fyrirmynd í námi fullorðinna ásamt Ragnhildi Gísladóttur sem stundaði nám hjá Fræðsluneti Suðurlands. Viðurkenningin er veitt árlega þeim einstaklingum sem hafa breytt stöðu sinni eftir þátttöku í úrræðum FA, sýnt framúrskarandi árangur, frumkvæði, kjark og náð að yfirstíga ýmiss konar hindranir.
Guðbergur kom til MSS árið 2013 og stundaði nám í Sölu-, markaðs- og rekstrarnámi. Guðbergur stofnaði fyrirtækið Cargoflutningar eftir miklar breytingar árið 2009 þar sem fjárhagur og einkalíf fór „í rúst“ að hans sögn ásamt því að verða atvinnulaus. Hann var fljótlega kominn með 3 sendibíla sem fóru á milli Reykjavíkur og Suðurnesja daglega.
Í ávarpi sem Guðbergur flutti á fundinum undir yfirskriftinni "reynslusögur námsmanna" sagði hann m.a.:
,,Árið 2013 las ég svo auglýsingu í Víkurfréttum um Sölu-, markaðs- og rekstrarnám hjá MSS, þegar ég las hvað væri kennt varð ég ákveðinn í að þótt ég hefði engan aukatíma yrði ég að fara í þetta nám og skráði mig daginn eftir. Í stuttu máli var námið skemmtilegt og vel sett framm fyrir mann eins og mig sem er með athyglisbrest. Í lokin gerðum við viðskiptaáætlun og höfðum einnig lært undirstöðuatriði í markaðssetningu en þetta hafði mig lengi langað að læra. Í kennslutímum leyfði ég kennurunum að nota mitt fyrirtæki Cargoflutninga sem dæmi og áttaði mig þá á að ég væri kannski með eitthvað í höndunum sem hægt væri að byggja á. Fljótlega voru Cargoflutningum komnir með 8 bíla og brjálað að gera“.
Guðbergur leggur mikla áherslu fólk opni augun fyrir þeim möguleikum sem eru í samfélaginu og voru lokaorð hans; „Fyrsta sem þarf auðvitað að gera er að hundskast út og leita að lausnum það kemur enginn til þín í sófann. Sem sagt rífðu þig upp og farðu út að gera eitthvað og ekki gefast upp þó á móti blási“.
MSS óskar Guðbergi innilega til hamingju með tilnefninguna sem hann verðskuldar svo sannarlega. Hann hefur sýnt og sannað að með þrauseigju og dugnaði má láta drauma sína rætast.