MSS, Landsmennt og Vísir hf. undirrita samning um fræðslustjóra að láni

Á dögunum undirritaði Vísir hf. samning við Landsmennt um fræðslustjóra að láni. Þá var undirritaður samningur við Markviss ráðgjafa frá Miðstöð símenntunar á Suðurnesjum um framkvæmd verkefnisins.
Verkefninu er ætlað að greina þörfina á fræðslu fyrir starfsfólk í landvinnslu fyrirtækisins og gera áætlanir um námskeið sem mynda munu fræðsluáætlun fyrirtækisins næstu misseri.

Starfsemi Vísis hf. byggist aðallega á útgerð og landvinnslu og beinist verkefnið að starfsmönnum landvinnslu fyrirtækisins í Grindavík.
Miklar breytingar áttu sér stað á síðasta ári í rekstri fyrirtækisins og við það fjölgaði starfsmönnum þess í Grindavík til muna en hjá fyrirtækinu starfa um 128 starfsmenn. Það er von samningsaðila að verkefnið stuðli að markvissu starfi fyrirtækisins á sviði fræðslumála og aukinni starfsánægju starfsfólks.