Það er aldrei of seint að læra

Sjálfstraust mitt gagnvart frekara námi er mikið betra og það hefur opnað huga minn gagnvart námsleiðum sem ég hefði aldrei trúað að gætu vakið áhuga minn. Þetta hafði töluverð áhrif á líf mitt því áður en ég byrjaði í náminu leit ég svo á að það væri of seint fyrir mig að byrja aftur í námi. Það hefur svo sannarlega reynst rangt hjá mér.

Ég er að bíða eftir að geta byrjað í iðnaðarverkfræði í Háskóla Íslands í haust.

Regína Þórðardóttir nemandi í Menntastoðum

Ég ákvað að fara í raunfærnimat vegna þess að ég þekkti manneskju sem hafði farið í svona mat. Síðan matið fór fram er ég búin að klára nám í matartækni frá MK. Ég fékk helling metið í raunfærnimatinu. Ég myndi segja við þann sem er að hugsa um að fara í svona mat að drífa sig því þetta er algjör snilld að eiga möguleika á því að ná sér í réttindi með svona auðveldum hætti.

Raunfærnimat í Matartækni hjá MSS í samstarfi við Iðuna fræðslusetur
Bryndís Rúnarsdóttir matartæknir - þátttakandi í raunfærnimati

Ég hafði ekki fundið mig í framhaldskólum þar sem prófkvíði og stress háði mér verulega. Eftir að ég byrjaði í Menntastoðum hefur sjálfstraust mitt aukist til muna og áhugi minn á áframhaldandi námi sömuleiðis. Eftir nám mitt hjá MSS er ég staðráðin í því að halda áfram að mennta mig og stefni ég á Grafíska hönnun eða eitthvað því tengt. Ég er óendanlega þakklát fyrir að hafa fengið það tækifæri að koma mér af stað aftur eftir hlé frá skóla með aukið sjálfstraust og gleði fyrir námi.

Sigrún Eir Einarsdóttir

Áður en ég fór í matið þá hugsaði ég; „afhverju á ég að pæla í þessu komin á þennan aldur, þá 47 ára“. Það kom mér á óvart hvað ég kunni mikið og það kveikti áhuga að klára fisktæknina og fyrst ég var byrjuð þá tók ég nám í gæðastjórnun eftir útskrift úr fisktækninni. Útskrifaðist svo sem gæðastjóri frá Fisktækniskóla Íslands í Grindavík. Þetta bætti sjálfstraust mitt töluvert.

Raunfærnimat í Fisktækni hjá MSS
Svanhvít Másdóttir þátttakandi í Raunfærnimati

Ég er núna í Keili og stefni á að byrja í HÍ haustið 2014. Ég vissi ekkert hvað mig langaði til að gera varðandi framhaldsmenntun fyrr en ég byrjaði í Menntastoðum. Þar var ég með frábæran enskukennara sem hvatti mig til þess að leggja enskuna fyrir mig. Áfanginn var mjög áhugaverður og þessi hvatning hennar gerði það að verkum að ég stefni á master í ensku.

Námið var á heildina skemmtilegt, góðir kennarar og sveigjanleiki í boði. Ég er nú þegar búinn að mæla með Menntastoðum við fleiri en einn sem ég þekki og mun hiklaust gera það áfram.

Henry Sverrisson nemandi í Menntastoðum

Ég hóf nám í menntastoðum vegna þess að mig vantaði mikið af einingum til að geta sótt um skólavist í Byggingafræði. Menntastoðir hentuðu mér fullkomlega, á tíu mánuðum gat ég tekið allar einingar sem mig vantaði í almennum fögum með fullri vinnu. Í náminu varð ég fljótt var við að kennarar virkilega vildu að okkur gengi vel og mín upplifun af kennurum og starfsfólki skólans var mjög góð. Þegar ég hóf námið voru 32 ár liðin frá því ég sat á skólabekk þannig að þetta var erfitt en líka gaman. Námið hjálpaði mér ótrúlega mikið og gaf mér sjálfstraust.

Námið gerði mér kleift að fá inngöngu í VIA University Collage sem er háskóli í Danmörku. Þar er ég í Byggingafræði sem tekur þrjú og hálft ár, ég er að klára aðra önn nú í enda júní. Námið hefur nýst mér mjög vel t.d. stærðfræði og bókfærsla.

Björn Sigurjónsson nemandi í Menntastoðum

Námið hitti beint í mark hvað sjálfsuppbyggingu og sjálfstraust varðar og undirbjó mig heildrænt undir framhaldið. Hvort sem verður fyrir valinu frekara nám, frumkvöðlastarf eða vinna. Námstæknin kemur sér vel í hvoru sem verður, því alltaf erum við að læra hvernig sem á það er litið. Kem ég jákvæðari út fyrir lífið og bjartsýnni á að vera fær um að ná árangri með það sem ég mun taka mér fyrir hendur.

Bjarndís Helena Mitchell nemandi í námsleiðinni Sterkari starfsmaður

Ég lenti í óhappi út í sjó sem gerði mig óvinnufæran og vildi nýta tímann á meðan. Fór fyrst í sterkari starfsmaður og í framhaldi af því þá kom sú umræða upp hvort ekki væri gott að senda mig í raunfærnimat. Fór semsagt í raunfærnimat og kláraði í framhaldinu fisktæknin. Tók síðan viðbótanám í Gæðastjórnun. Ég hvet alla eindregið til að fara í raunfærnimat á meðan það býðst. Þetta gefur manni forskot í námið. Að fara í nám á mínum aldri virkar eins og vítamínsprauta í tilveruna.

Raunfærnimat í fisktækni hjá MSS
Robert Henry Vogt gæðastjóri - þátttakandi í raunfærnimati

Ástæðan fyrir því að ég fór í raunfærnimat er sú að mig langaði í viðskiptafræði. Ég lauk ekki stúdentsprófi á sínum tíma en kláraði verslunarskólanám í Danmörku.Byrjaði á því að fara í raunfærnimat hjá MSS og stunda nú nám við HÍ í viðskiptafræði við HÍ. Er með mikla lesblindu sem hefur fram að þessu haft neikvæð áhrif á mig. Raunfærnimatið hefur fært mér vilja og trú á að ég geti lært og ég myndi ráðleggja öllum að skrá sig í raunfærnimat hjá næstu símenntunarstöð.

Raunfærnimat í Verslunarfagnámi hjá MSS
Kristinn Sigurjónsson sölumaður í Fríhöfninni - Þátttakandi í raunfærnimati

Námið gaf mér aukna þekkingu á tölvur og í bókhaldi sem gæti nýst mér vel í framtíðinni. Ég kynntist alveg ótrúlega skemmtilegum nemendum og kennurum í náminu. Mjög skemmtilegt og áhugavert nám sem allir ættu að athuga.

Laufey Björk Sigfúsdóttir nemandi í Skrifstofuskólanum

Námið var bæði krefjandi og skemmtilegt. Gaf mér sjálfstraust og veitti góðan undirbúning fyrir nám í Háskóla Íslands. Sérstaklega naut ég góðs af því að læra uppsetningu góðra ritgerða, ritvinnslu, tölvuvinnslu auk þess að öðlast sannfæringu á að ég gæti lært stærðfræði. Menntastoðir er frábær byrjun bæði fyrir þá sem hafa ekki verið í skóla lengi og góð byrjun fyrir þá sem stefna lengra.

Útskrifaðist með BS í Ferðamálafræði og framtíðin er björt.

Dagmar Jóna Elvarsdóttir nemandi í Menntastoðum

Nám var eitthvað sem ég taldi mér trú um að væri ekki fyrir mig. Í Menntastoðum víkkaði sjóndeildarhringurinn og smátt og smátt var farið að grafa undan þeim viðhorfum að ég gæti ekki lært, ég gæti ekki lesið og að ég myndi aldrei geta farið í bóklegt nám. Nám hefur áhrif á svo margt sem snertir daglegt líf og veitir manni sjálfstraust til að takast á við lífið.

Kristjana Þórarinsdóttir nemandi í Menntastoðum

Það sem dreif mig fyrst og fremst í Grafíska hönnunarsmiðju var að ég hef alltaf haft mikinn áhuga á allskyns tölvuvinnu og myndvinnslu. Fyrirkomulagið var til fyrirmyndar og fékk ég allt það sem ég vildi fá út úr námskeiðinu. Kennarinn var frábær og fannst mér það hafa mikið að segja og það vakti enn meiri áhuga.

Sigrún Eir Einarsdóttir

Til að byrja með var ég ekki viss um hvort að það gengi upp að vera í skóla með vinnu á sjó.
En svo var bara að henda sér af stað og allt hefur gengið vonum framar.
Allir starfsmenn MSS koma svo mikið til móts við þarfir mínar að hálfa væri nóg.
Ég er að róa í skiptakerfinu 3-1 og hef aldrei þurft að taka auka frítúr til að sinna náminu.

Sindri Hreiðarsson nemandi í Menntastoðum

Nám var eitthvað sem ég taldi mér trú um að væri ekki fyrir mig. Í Menntastoðum víkkaði sjóndeildarhringurinn og smátt og smátt var farið að grafa undan þeim viðhorfum að ég gæti ekki lært, ég gæti ekki lesið og að ég myndi aldrei geta farið í bóklegt nám. Nám hefur áhrif á svo margt sem snertir daglegt líf og veitir manni sjálfstraust til að takast á við lífið.

Kristjana Þórarinsdóttir nemandi í Menntastoðum

Eftir námið veit ég hvaða möguleikar þessi forrit, photoshop, indesign og illustrator bjóða upp á og ég er viss um að ég geti nýtt mér það í framtíðinni. Þó það væri ekki nema að vinna mín eigin boðskort, jólakort, afmæliskort o.s.frv. Tilgangurinn með að fara í þessa smiðju var að sjá hvort að grafísk hönnun væri eitthvað fyrir mig. Ég er afar spennt fyrir því að læra meira í grafískri hönnun eftir þetta námskeið og þá helst erlendis.

Dagmar Fríða Halldórsdóttir

Menntastoðirnar komu mér algjörlega af stað í áframhaldandi nám. Það að byrja aftur í námi eftir langan tíma getur verið strembið en með skipulagi og jákvæðni geta það allir. Eftir Menntastoðirnar fór ég í Háskólabrú Keilis sem ég kláraði í maí. Í haust er stefnan tekin á Háskóla Íslands og ætla ég að fara í Þroskaþjálfafræði. Ég mæli með Menntastoðum fyrir alla sem eru að hugsa um að fara í nám eftir langt frí.

Elva Björk Guðmundsdóttir