Raunfærnimat er leið til að meta og viðurkenna þá færni og þekkingu sem fólk hefur aflað sér í starfi, námi og daglegu lífi. Með raunfærnimati verður fyrri reynsla sýnileg og metin á móti viðmiðum náms eða starfs.

Raunfærnimat getur hjálpað einstaklingum að nýta reynslu sína betur, fá hana metna, sjá eigin styrkleika skýrar og taka næstu skref í námi eða starfi.

Fyrir hverja er raunfærnimat?

Raunfærnimat er einkum ætlað einstaklingum sem hafa reynslu af ákveðinni starfsgrein en litla formlega menntun á viðkomandi sviði.

Almennt er miðað við að einstaklingur:

• hafi náð 23 ára aldri
• hafi að minnsta kosti þriggja ára starfsreynslu í faginu
• hafi ekki lokið stúdentsprófi

Skilyrði geta þó verið mismunandi eftir verkefnum og starfsgreinum.

Hvað getur raunfærnimat gefið þér?

Raunfærnimat getur hjálpað þér að:

• fá viðurkenningu á færni og reynslu
• stytta nám
• auðvelda þér að hefja nám á ný
• styrkja stöðu þína á vinnumarkaði
• átta þig betur á styrkleikum þínum
• sjá hvað þú þarft að efla til að ná markmiðum þínum

Hvernig fer ferlið fram?

Raunfærnimat fer fram í nokkrum skrefum. Ferlið getur meðal annars falið í sér:

• viðtal við náms- og starfsráðgjafa
• skráningu á reynslu, þekkingu og hæfni
• sjálfsmat og vinnu með gögn
• matssamtal við fagaðila
• niðurstöður og ráðgjöf um næstu skref

Markmiðið er að draga fram þá færni sem einstaklingur hefur þegar öðlast og skoða hvernig best sé að nýta hana áfram.

Hvaða raunfærnimat er í boði hjá MSS?

Hjá MSS er boðið upp á raunfærnimat á mismunandi sviðum, fer allt eftir þörf og eftirspurn hverju sinni.

Almenn starfshæfni
Í mati á almennri starfshæfni er lögð áhersla á almenna og persónulega hæfni sem nýtist í starfi og daglegu lífi. Matið getur hjálpað einstaklingum að átta sig betur á styrkleikum sínum og hvaða hæfni þeir hafa þegar byggt upp.

Matartæknir
Raunfærnimat fyrir matartækna er ætlað þeim sem hafa aflað sér reynslu og þekkingar í matreiðslu og störfum í eldhúsum og mötuneytum.

Þjónustugreinar
Raunfærnimat í þjónustugreinum getur meðal annars átt við störf á leikskólum, í grunnskólum og í félagslegri þjónustu.

Iðngreinar
MSS veitir upplýsingar og aðstoð vegna raunfærnimats í iðngreinum í samstarfi við Iðuna fræðslusetur.

Kostnaður
Raunfærnimat er almennt að kostnaðarlausu fyrir einstaklinga sem ekki hafa lokið námi á framhaldsskólastigi. Nánari upplýsingar eru veittar í ráðgjöf.

Hafðu samband
Ef þú vilt kanna hvort raunfærnimat henti þér eða ef þú vilt fá aðstoð við að finna raunfærnimat fyrir þína grein þá er gott að hafa samband við náms- og starfsráðgjafa MSS. Þar færðu upplýsingar um hvaða raunfærnimat er í boði, hvort þú uppfyllir skilyrði og hvert næsta skref er.

Frekari upplýsingar um raunfærnimat veita: 

Steinunn Björk Jónatansdóttir í síma 412 5940 / steinunn@mss.is
Inga Sif Ingimundardóttir í síma 412-5958 / inga@mss.is