Nemendur MSS hafa rétt á því að leiðbeinendur og kennarar leggi fram kennsluáætlun sem að staðið er við. Þar komi fram námsmarkmið og hvað þarf til að uppfylla námslok.
Nemendur bera ábyrgð á eigin námi, framkomu sinni, umgengni og samskiptum sínum við aðra nemendur og starfsfólk.
Nemendur og aðrir sem sækja nám, námsleið eða námskeið á vegum MSS hafa rétt á að láta skoðun sína í ljós. Ætíð skal gæta réttmætis þegar málin eru skoðuð og lagt upp með að ágreiningsefni séu rædd af virðingu og sanngirni þar sem markmiðið mun ætíð vera að leita lausna innan stofnunarinnar sé sá möguleiki fyrir hendi.
Starfsfólk og einstaklingar sem starfa fyrir MSS bera ábyrgð á hegðun sinni og framkomu og skal fylgja reglum jafnt laga- og siðferðislega. Einnig skal hafa siðareglur viðkomandi fagfélaga til hliðsjónar.
Komi upp sú staða að starfsfólk og verktakar þurfi að leita réttar síns. Skal ætíð byrja á því að leita til forstöðumanns.
Ágreiningsmál skulu ætíð berast með skriflegum og rekjanlegum hætti. Við vinnslu mála skal taka mið af stjórnsýslulögum um framhaldsfræslu nr. 27/2010.
Ef til þess kemur að beita þurfi viðurlögum skal nemandi ætíð vera upplýstur um heimildir til að kæra ákvörðun fræðsluaðila til mennta- og barnamálaráðuneytis.
Ef upp kemur að hegðun nemanda reynist erfið og/eða óviðeigandi skal leita orsaka þess og vinna í því að finna bót á.
Komi upp ágreiningur á milli nemenda, milli nemanda og kennara og/eða annarra starfsmanna og ekki tekst að finna lausn á málinu skal því vísað til viðeigandi verkefnastjóra. Ef að einhverjum ástæðum er ekki hægt að leita til verkefnastjóra skal leita til forstöðumanns. Hið sama gildir komi fram brot á reglum eða brot á almennu hátterni.
Komi upp ágreiningur milli nemenda og kennara um mat á úrlausn/lokaeinkunn sem ekki tekst að leysa þeirra á milli geta nemendur snúið sér til forstöðumanns og óskað eftir mati sérstaks matsmanns. Þá skal kveða til óháðan matsaðila sem metur námsmatið. Úrskurður matsmanns gildir og fer ekki áfram til æðra stjórnunarvalds.
Ef ofangreint dugar ekki nemendum skal vísað til næsta stjórnsýslusviðs, mennta- og barnamálaráðuneytisins og til viðkomandi stéttafélags til að fá aðstoð.