19. desember 2019
Útskrift námsleiða hjá MSS
Þann 18. desember var haldin sameiginleg útskrift námsleiða hjá MSS en að þessu sinni útskrifuðust 68 nemendur af fimm námsleiðum. Útskrifað var af Skrifstofuskóla I og II, Fagnámskeiði fyrir starfsfólk í heilbrigðis- og félagsþjónustu, Grunnmenntaskóla og Menntastoðum.
Það var hátíðarbragur yfir athöfninni og áfanganum fagnað innilega af nemendum, starfsfólki MSS, kennurum og gestum. Það er mikilvægur áfangi að ljúka námi og efla sig þannig í lífi og starfi.
Guðjónína Sæmundsdóttir, forstöðukona MSS hélt ávarp og nefndi þar m.a. mikilvægi þess að hafa augu á markmiðum sínum og draumum og halda áfram veginn þar til þeim hefur verið náð. Ávarp nemenda flutti María Sigurðardóttir sem útskrifaðist frá Menntastoðum. María sagði sögu sína í námi og hvernig hún tók ákvörðun um að öðlast menntun og stefna að markmiðum sínum.
Við óskum öllum útskriftarnemendum innilega til hamingju með áfangann, megi ykkur vegna vel í framtíðinni og allir ykkar draumar rætast.